غبرت .. هنيت شي وحدين من وجهي ..

ما علينا عدت و العود محمود ( معرت شكون هاذ محمود ) ..

كان يا مكان في .. لا .. سرحت .. هاذي قصة واحدة أخرى حتال للمرة الجاية و نعاودها ..

اسيادي الصيمانة اللي فاتت جاو الخطاب يدقو .. حقا قالك شافوني و جاو قاصدين و المقصود الله ..

واقيلا اللي شافني عمى و لا غير غلطو في لاضريس ..

المهم غير رجعت نهار الخميس من الخدمة حتا تلقات ليا الواليدة بالخبر السعيد .. راه غادي يجيو فيك الخطاب ..

اويلي .. شكون هاذ المسخوط .. فالت ليا بلي راهم مكيعرفوهنش .. و لكن قالك شي واحد شافك و سول عليك و راهم جايين نهار السبت ..

تا هذا ما لقى ميدير في الصامدي قال حقا اجي نمشي نخطب في مريم و ندوز النهار ..

اصلا انا معنديش ذيك الفكرة ديال الزواج التقليدي و لا الزعتر .. واحد منعرفو ميعرفني جاي غير على السامع ..

 ولكن بيني و بينكم بغيت نجرب ذيك اللعبة ديال المسلسلات الميصرية اللي العريس هو و مو جالسين في الصالة و ندحل عليهم بالعصير و مو تقول بسم الله قمر 14  و لا  15 ..

و لكن في حالتي غادي تقول بسم الله الرحمن الرحيم .. سلام قولا من رب رحيم .. و غادي تقرا المعوذتين باش تصرفني ..

وايلي شكون زعما هاذا اللي كان قاني و مسول و جاي قاصد.. ياك ما شي مسخوط من الدرب .. و لكن كلهم كنعرفهم .. غير المساليين و حتا واحد ميديرها ..

وسوسني هاذ خينا .. ما علينا السبت قريب و نشوفو هاذ السي السيد شكون ..

الجمعة شديت الستون انا و صاحبتي بالتقشاب على الزواج و الخطبة .. كنمثلو هي العريس و انا العروسة و داخلة عليها بأتاي و خطباتني من واحد النونوس جلسناه في الصالة زعما الواليد و جلسات كتقول ليه أعمي انا جيت نهنيك من هاذ الخايبة .. شحال تعطيني .. و جات الواليدة خـ ( ب ) ـطاتنا بجوج حيث رونا ليها الحالة ..

المشكلة انو معندي حتى شي صورة ديال شي فارس احلام في هاذ الراس زعما نبدا ندير ذاك الشي ديال كاظم الساهر و حافية القدمين ..

صباح السبت .. فقت حتال 11 .. انا خاصني نتزوج بخدامة ماشي براجل ..

الناس غادي يجيو مع 4 ورا العصر ..

ورا الجموعة ( صلاة الجمعة ) قشبو عليا البرهوشات مزيان فضحاتني ذيك خيتنا معاهم ..

و دارو ليا ذيك تنتررن تن تن تن تن ( ديال المصريين ) إتمتختري يا خايبة يا عروسة ..

الربعة قل قسمين . انا و ختي شادين الشرجم باغيين نشوفو شكون هاذا اللي غادي يتم جاي قاصد الدار و جراتنا الواليدة من الشرجم… أويلي اش بغيتو يقولو الناس مدليين عليهم من الشراجم ..

الربعة و ربع غاد صوناو .. انا لاعبة

المزيد

ـــــــــــــــــــــــــــــــــــــــــــــــــــــــــ

التصنيفات : قصصي | السمات:قصة قصيرة

دوّن الإدراج

رأيت هذا الخبر قبل قليل في نشرة أخبار التاسعة

و أردت أن أحولها إلى قصة بمنظور شخصي لعل الرسالة تصل

كل الأحداث من خيالي سوى الخبر فهو صحيح

**********

ما كانش خاصها تمشي عند الطبيب باش تعرف أنها حاملة ..

لأنها أم لثلاثة الدريات .. و عرفات بلي راها حاملة في الرابعة ..

أمينة ( إسم مستعار ) .. عندها 34 عام …  هذا هو العام الطلطاش مع راجلها …

كيقولو خداو بعضياتهم عن حب .. أمينة مرة كيما كيقولو مكتهش الدجاجة على بيضتها.. و داخلة سوق راسها.. مكتهدر مع جارات .. ماكتخالط الناس .. باغا غير تعيش و تربي بنياتها …

عندهم 3 البنات .. حسناء و سعاد و كريمة ( إستعارة أيضا .. هاذو سميات بنات دربنا)..

راجلها في اللول كان كيتعامل معاها مزيان و ملي ولدات ليه البنية اللولة فرح بزاف و حمد الله ..

و حتا ملي جات الثانية فرح بيها .. و لكن بحالو بحال أي راجل كيبغي يكون عندو وليد .. و بدا كيلمح ليها بشي هدرة مرة مرة .. و هي كتقوليه اللي جابو الله مزيان ..

ايام جات و ايام مشات و جات البنية الثالثة … هاذ المرة حمد الله غير بزز .. ماشي بنية صافية .. و بدا كيحشي الهدرة لمرتو في كل وقت و وقت .. وانتي تبقاي تبلزي ليا غير البنات .. كاع سيادي دارو الدراري و انا عندي غير البنات .. و امينة مكتقول غير و الحمد لله .. البنات كيدخلو الجنة … الالة انا باغي الولد ..

( اش بغيتي دير تمشي تصايبو ليك .. ) ..

و ككل الرجال و رغم انه مستواه الدراسي عالي و انه يعرف انه لادخل للمرأة في تحديد جنس المولود بل كل ذلك راجع له إلا أن حمية العصبية التي تعود لأكثر من 15 قرنا لا تزال راسخة بداخله ..

و لا غير على سبة .. و ديما كيضرب بناتو .. و مبقاش يديها فيهم .. وحتى علاقتهم اصبحت باردة .. ( يقال انهما اخذا بعضهما عن حب)

و دازت ليام و هي صابرة على ذاك الذل غير على قبل بناتها .. حتى جا واحد النهار و حسات بشي حاجة في كرشها .. و عرفات أنها حاملة … كانت كتدعي الله باش يكون وليد …

و ملي عرف انها حاملة .. داها عند الطبيب باش يعرف باش حاملة …

و ملي سمع انها بنت .. ( ظل وجهه مسودا و هو كظيم )..

و مشى و خلاها راجعة بحدها في الطريق .. و في اللي ملي جا .. بدا كيغوت كيما عادتو ..

انا عييت من هاذ العيشة .. نتي باغا تربطيني بالبنات .. كديريها بلعاني ..( اه كديرها بلعاني .. كتسيفط طلب باش تحمل ببنت ضد فيك ) ..

يانا مار منك ( مللت منك بالفرانسوية ) .. انا خاصني الولد .. خاصني الدري اللي يوقف معايا و نعو

المزيد

ـــــــــــــــــــــــــــــــــــــــــــــــــــــــــ

التصنيفات : قصصي | السمات:قصة قصيرة

دوّن الإدراج

  كثيرا ما يسألني احد السؤال السخيف الاكثر شيوعا في المغرب : رجاوية و لا ودادية .. يكون ردي رجاوية فقط لأن والدي رجاوي أما أنا ما بيني و بين الرجاء غير الخير و الإحسان .. و دائما ما ننتظر اللقاء المرتقب بين الفريقين او الديربي .. حيث إلى ربحات الرجاء..  الواليد كيكون ناشط و اللي قلتيها ليه ميقولش ليك لا .. مكرهتش انا يكون الديربي كل سيمانة و تربح الرجاء ديما .. باش ندير للواليد فاييت ..اما الماتش ما كيهمنيش . و اللي كهمني منو هو أحداث النهاية ( ليس احداث النهاية  للشيخ حسان ) إنما أحداث نهاية المقابلة و لا اقصد النتيجة بل .. الشعالة ..

الشعالة الي كتنوض في اللخر .. بنادم كيتفرشخ ….بك شري تربح..

ذيك الهيلالة هي كلشي …

و الدم .. إلى مسال الدم هي والو ..

فما إن تنطلق صافرة الحكم معلنة نهاية الدقائق التسعون من عمر اللقاء .. حتى يسكت أهل المكانا المحترمين من الصياح ( سان سيرو .. سان سيرو ) او ( هبلنا العديان ..)  و سكان فريميجة أيضا.. و تشتعل .. ضرب فيا نضرب فيك .. و كيبداو الثيران ( جمع ثور ) في التيران ( مفرد ملاعب ) .. ما كاين غير عفط عليا نعفط عليك .. اللي عندو شي قرعة ديال الجاج كيشير بيها .. اللي عطاه ربي شي صحة راه بارك كيخمج في عباد الله و الكراسا كستشايرو .. و  البوليس نازل سباط .. هاك بالاك ..

و كيحلو ليهم البيبان … ( مووووووووووووو ) طلق البـgـر لبرا يخوي الكبت ديالو في الطوبيس

المزيد

ـــــــــــــــــــــــــــــــــــــــــــــــــــــــــ

التصنيفات : قصصي | السمات:قصة قصيرة

دوّن الإدراج

القصة حقيقية و تتكرر دائما و أردت أن أضعها بمنظور شخصي

*******

اي … اربي سيدي .. عوك عووووووووووك يا عباد الله .. واااااااااااااي ..

لا هاذي ماشي شي وحدة كتgـريسا .. هاذي وحدة حاملة قربت تولد ..

المكان : سبيطار الوالدات ..

الزمان : تسعود ابريل 2007 .. مع الحداش ديال النهار ..

القابلة : فاطمة .. عندها الشهادة … و ذات سوابق ..

الطبيب : باقي ماجاش ..

المرة الحاملة كتغوت ربي اللي خلقها .. كرشها قد المضربة .. هاذي راها فاتت تشع شهر للهيه ..

- اييييييييييي .. عتقوني …

- تي سكتينا ..غير نتي اللي حاملة في هاذ البلاد…ها الطبيب جاي  و يشوفك .. عتيقة أجي عونيني ندخلو هاذ المرة لهيها .. يالاه زربي ..يالاه حتا نتي بلا تقلاش علينا .. عيالات اخر الزمن ..اش ذاك تحملي ملي ماقاداش عليه..

( تا شوف المرة مثقلة ب 300 كيلو و لاخرة باركا تعقد فيها ..)

دخلوها لواحد البيت و نعسوها فوق واحد النموسية يا عوذ بالله كيدايرة.. مقعرة و ليزار مسخ . السلامة يا ربي..

قابليها أعتيقة هانا راجعة ..

خرجات فاطمة من ذاك البيت و مشات لواحد البيت أخر كيحطو فيه الحوايج ديالهم ..و جبدات ساكها و خرجات واحد الكارت فيزيت .. و دوزات ذيك النمرة اللي فيها من بورطابلها ..

تربن تربن .. ترن ترن ..

الو مدام فريدة .. اه انا فاطمة القابلة .. لاباس الحمد لله .. شوفي ها هيا وحدة جات .. قريبة أه .. شي نص ساعة كاع و تولد .. يالاه .. و متنسايش المعلوم .. ذاك الشي اللي تافقنا عليه ..يالاه انا نمشي نقابلها .. واخا كيتوصلي صوني عليا .. و نخرج عندك ..

و رجعات فاطمة عند المرة الحاملة ..لقاتها مازال كتعـوـg مسكينة ..

- عتيقة عافاك أختي شوفي ليا شي سرابت و جيبي ليا شوية الما .. راه الطبيب مازال معطل ..

يالاه نتي راك قربتي تهناي .. تنفسي مزيان .. و ملي نقول ليك بداي الدفعي .. دفعي و زيري النفس .. ( هاذ الشي شفتو في المسلسلات المصرية .. باقي محضرت لحتا زيادة .. الوصف غير دقيق غير سلكو) .

جاو السرابت و جا الما طايب .. غادي تسلقها المسخوطة .. غلاتو بحال إلى غادي تصايب القهوة ..

- يالاه دفعي و قالتها بالفرونسي ( بوووس ) ..

المرة ما فاهما والو .. ما قارياش .. بقات غير تغوت ..

- و تي دفعي …

أأأأأأأأأأأأأأأأأأأأأأأأأأأأأأأأأ .. عنداك غير تدفع شي حاجة خرا نوليو كنسيقو هنا ..

- يالالالالاه .. دفعي مزيان … ها الراس بدا يخرج .. ها هوا .. عتيقة ذاك الطرونشوار .. زبط …

صلاي للخلفية … وااااء واااء واااء … ( العصا من صغرنا .. يخ ..) ..

- على سلامتك .. جبتي وليد ..

عتيقة دgـي ليها شي برا باش ترتاح .. هانا نديه للعنبر و نرجع …

مشات فاطمة للبيت ديال الحوايج .. و لفات الساط الصغيور في واحد الملاية .. و بيبات على ذيك مدام فريدة .. و هي تعيط ليها لخرى ..

- مبرووك عليك ألالة .. وليد بُّيَّضْ بحالك .. هانا غادي نخرج لعندك من الباب اللوراني ..

و كمشات الوليد في واحد السويك .. و نزلات ودارت على السبيطار من الجردة .. و حلات الباب اللوراني و مشات لواحد الكات كات كحلة .. و طلعات …

بسم الله ألالة فريدة .. ( نتي تعرفي الله بعدا ) .. ها وليدك …. شوفي سبحان الله كيدي منك ..

- واو … كيلي بوووو ( شحال جوين ) ..

المزيد

ـــــــــــــــــــــــــــــــــــــــــــــــــــــــــ

التصنيفات : قصصي | السمات:قصة قصيرة

دوّن الإدراج

هانا جيت ..

كنت في الجامع .. صلينا العشا ..

دازت عدنا الحاجة فاطمة - جارتنا- باش نمشي معاها للجامع .. مسكينة مرة كبيرة و كيخص اللي يgـودها في الطريق .. و عزيز عليها تديني معاها حيث كنقرا عليها الأحاديث ديال رياض الصالحين و نشرحهم ليها ..

لبست جلابتي و درنا اليد في اليد و شدينا الطريق .. و كتدعي معايا مسكينة بكاع ذاك الشي اللي حافظاه .. الله يعطيك النجاح .. الله يوفقك .. الله يعطيك خبيزة ديال الحلال .. الله ينورك .. الله يزوجك ( أمييييييييييييييييييييييييين أمي فاطمة أمييييييييييييين ) ..

وصلنا للجامع و باقي ذيك الساعة مأذنش العشا .. و الجامع ديال العيالات عامر .. بحال إلى ساكنين تما ..

السلام عليكم .. و جلست مي فاطمة ..و جلست حداها .. بدات كتسبح و بديت حتا أنا معاها بالشوية .. و لكن مكملتش حيث ميخليوكش ..

حث حث حث حث حث .. دو دو دو دو دو ….

فلانة دارت .. فلان جا .. اويييلي .. فوقاش .. ناريي علاش .. لا تـgـوليها .. و ديرها  ..

اسلامة هاذ العيالات ميتقاداوش .. ( أنا باقي موليت عيالة .. ممحسوباش عليهم ) ..

و أش كيديرو لتقرقيب الناب .. و النميمة في السوق .. في العتابي .. في الجرادي .. من الشراجم .. في الحمايم حدث و لا حرج .. و زايدينها في الجوامع ..

واحد الجوجات كيشوفو فيا .. كيgـولو دبا واش هاذي مزوجة و لا بايرة.. مرة و لا عزبة .. و عندهم شي عينين .. و لانفرا روج ..

و ..

الله اكبر … الله أكبر …

الأذان …

ضربو الطم .. كلهم سكتو .. شي وحدات يلاه بداو يجيو .. سعاد دخلات شافتني و هي تفضحني .. مريم .. مريم ..شدي شي بلاصة حداك .. ها ويلي على شدي بلاصة .. باركينج ديال العيالات .. اجي بلاصي هنا .. جمعي روايضك شوية - رجليك بغيت نقول - ..

سعاد قالت ليهم متعرفوش ( ها هيا جالسة حدايا دابا يعني مكنهدرش فيها بالغيبة ) تا هيا بدات دو دو دو ( اي ضرباتني ) ..

إقامة الصلاة .. هيا الإمام جا ..

تراصو و إعتدلو .. خاصو يزيد للعيالات و سكتو …

الله أكبر …

صوتو زوين تبارك الله .. كيأثر في الناس ..

سورة الفاتحة وسورة الطارق .. ركوع فسجود فقيام ..

سورة الفاتحة ..و بدأ في سورة الأعلى ..

……………………و نيسرك لليسرى ………………………….

المزيد

ـــــــــــــــــــــــــــــــــــــــــــــــــــــــــ

التصنيفات : قصصي | السمات:قصة قصيرة

دوّن الإدراج